Agora que as pílulas anticonceptivas non están subvencionadas que outros métodos anticonceptivos se poden empregar?

Que as pílulas anticonceptivas non estean subvencionadas polo sistema sanitario non quere dicir que non se poidan empregar, senón que a usuaria ten que pagar o importe íntegro do produto (como ocorre con outros métodos hormonais: parche transdérmico e o anel vaxinal).

Para a súa adquisición destes métodos é necesario a denominada “receita branca” emitida por un/ha médico/a, aínda que pode ocorrer que non todas as farmacias o esixan.

Existen outros métodos anticonceptivos que si están subvencionados polo sistema sanitario, coma o DIU (de cobre ou hormonal), o implante subdérmico, o inxectable hormonal e a ligadura de trompas.

De todos os xeitos á hora de empregar calquera método anticonceptivo é recomendable a indicación facultativa dun/a especialista, que será quen che indica cal é o método máis apropiado para a o caso, xa que existen diversos métodos no control da natalidade.

Esperamos que esta información resolvera as túas inquedanzas, senón non dubides en volver a poñerte en contacto connosco ou se tes algunha outra. Grazas.