As novas directrices terapéuticas da Organización Mundial da Saúde (OMS) recomendan un inicio máis temperán do tratamento antirretrovírico (TAR). Probas recentes indican que un TAR máis cedo axudará aos infectados/as polo VIH a vivir máis tempo e con mellor saúde, ademais de reducir substancialmente o risco de transmisión do virus. Este cambio podería evitar 3 millóns máis de mortes e 3,5 millóns máis de novas infeccións polo VIH de aquí ao 2025.

As novas recomendacións preséntanse nunha publicación da OMS titulada Directrices unificadas sobre o uso de medicamentos antirretrovíricos para o tratamento e a prevención da infección polo VIH, ao mesmo tempo que novos datos revelan que a finais de 2012 había 9,7 millóns de persoas en tratamento con estes fármacos que poden salvarlle a vida aos pacientes.

“Estas directrices representan outro salto adiante na tendencia a fixarse obxectivos cada vez máis ambiciosos e a obter logros cada vez maiores”, dixo a Directora Xeral da OMS, Dra. Margaret Chan. “Agora que hai preto de 10 millóns de persoas en tratamento con antirretrovíricos, algo impensable fai tan só algúns anos, podemos alimentar o impulso necesario para forzar a declinación irreversible da epidemia de VIH”.

Iniciar máis cedo o tratamento antirretrovírico

Nas novas recomendacións aléntase a todos os países a que inicien o tratamento dos adultos infectados por VIH cando a cifra de linfocitos CD4 sexa igual ou inferior a 500/mm³, é dicir, mentres o sistema inmunitario aínda é forte. A recomendación anterior da OMS, establecida en 2010, era ofrecer tratamento cando dita cifra fose igual ou inferior a 350/mm³. O 90% dos países adoptaron a recomendación de 2010, e algúns, como Alxeria, Arxentina ou Brasil, xa están a ofrecer tratamento aos pacientes con 500 células/mm³.

A OMS baseou a súa recomendación en probas que revelan que o tratamento máis temperán con fármacos seguros, alcanzables e de manexo máis fácil pode manter saudables dos/as pacientes infectados polo VIH, ademais de reducir a cantidade de virus no sangue, o cal reduce á súa vez o risco de transmisión a outras persoas. No informe sinálase que se conseguen integrar estes cambios nas políticas nacionais de loita contra o VIH e apoialos cos recursos necesarios, os países obterán importantes beneficios desde o punto de vista tanto da saúde pública como da saúde individual.

Proporcionar o tratamento aos menores de 5 anos e embarazadas

Nas novas directrices tamén se recomenda proporcionar TAR a todos os menores de 5 anos, todas as embarazadas e todas as mulleres lactantes con infección polo VIH, así como a todos os/as infectados cuxa parella non estea infectada, independentemente da súa cifra de linfocitos CD4. A Organización segue recomendando a administración de TAR a todos/as os/as infectados/as polo VIH que tamén padezan tuberculose activa ou hepatite B.

Outra nova recomendación é que se ofreza a todos os adultos que empecen a tomar TAR a posibilidade de recibir un só comprimido diario dunha mesma combinación de medicamentos en doses fixas que é máis fácil de tomar e máis segura que as combinacións alternativas recomendadas anteriormente, e que pode utilizarse en adultos, embarazadas, adolescentes e nenos maiores.

“Avances como este permiten que os nenos e as embarazadas accedan ao tratamento antes e con maior seguridade, e que nos acheguemos ao obxectivo de lograr unha nova xeración sen SIDA”, dixo Anthony Lake, Director Executivo do UNICEF. “Agora temos que intensificar os nosos esforzos e investir en innovacións que nos permitan realizar as probas máis rapidamente nos recentemente nados, a fin de proporcionarlles un tratamento adecuado para que poidan empezar a vida nas mellores condicións posibles”.

Fonte: OMS