O delegado para o Plan Nacional sobre Drogas, Francisco de Agarrades Babín, anunciou no Congreso unha lei que fixará o “acceso ao consumo de sustancias legais con potencial aditivo".

Despois do tabaco, o alcol. O delegado do Goberno para o Plan Nacional sobre Drogas, Francisco de Agarrades Babín, anunciou no Congreso dos Deputados unha lei que fixará o “acceso ao consumo de sustancias legais con potencial aditivo”. É dicir, ao alcol. E esta será a maioría de idade, os 18 anos. Na actualidade só queda unha comunidade na que a venda de alcol a menores estea permitida: Asturias, aínda que houbo propostas respecto diso.

A idea non é nova. Este límite legal era un dos compoñentes básicos da lei que preparou Elena Salgado, cando foi ministra de Sanidade (2004-2006) para regular o consumo de alcol, e que tivo que abandonar. Entón, o Partido Popular orquestrou unha campaña -aí xurdiu o famoso “Viva o viño” do actual presidente, Mariano Rajoy” que acabou tombando a proposta. Aquel proxecto de lei tamén fixaba límites horarios para a venda de bebidas, mesmo para adultos, que foi outro dos grandes argumentos contra a norma.

Desde entón a maioría das comunidades regularon o acceso ás bebidas alcohólicas (as últimas foron Galicia e Castela e León) e estableceron a idade mínima en 18 anos. Claro que, ao non haber unha lei nacional, sempre cabería a posibilidade de que algunha comunidade dese marcha atrás á norma, que é o que o Ministerio de Sanidade non quere.

Babín non indicou se habería algunha excepción á lei. Entón o sector vitivinícola, o dos cervexeiros e o da sidra mobilizáronse para crear unha diferenza na regulación en función da gradación da bebida que permitise ser máis flexible co de menos contido alcohólico.

De feito, o alcol ten unha consideración especial en España, onde non se inclúe de maneira xeral e oficial entre as drogas - algo que xa sucede co tabaco -, xa que polo seu peso na economía considerouse o viño como un alimento.

Quizá esta visión permisiva explique que segundo a última enquisa do Plan Nacional sobre Drogas, con datos de 2008, o 58,5% dos/as estudantes de idades entre 14 e 18 anos consome alcol de maneira habitual. Menos do 20% non o probou. É con moito a droga máis consumida, con 20 puntos máis que o tabaco.

Ademais, o ministerio realizará accións de prevención a través das Asociacións de Nais e Pais e promoverá o lecer alternativo.

FONTE: Unioón de Asociación e Entidades de Axuda ó Drogodependente