Investigadores do Centro Nacional de Investigacións Oncolóxicas (CNIO) descubriron por primeira vez unha importante función protectora da proteína Fra1 no fígado, que neutraliza o dano causado por axentes tan comúns como o acetaminofeno ou o alcol.

A investigación, que se publica este venres na revista “Hepatology”, realizouse sobre un modelo animal, un rato “superdetoxificador” xerado polo equipo de Erwin Wagner, director do Programa da Fundación BBVA-CNIO de Bioloxía Celular do Cancro e investigador do Advanced Grant.

"O noso rato sobreproduce Fra1 só en fígado, o que nos permitiu estudar a súa función específica neste órgano e eliminar así efectos colaterais que un exceso de proteína poida ter noutros tecidos", explica Sebastian Hasenfuss, primeiro autor do traballo.

Segundo describe o artigo, a sobreproducción de Fra1 no fígado destes ratos protexe ao órgano do dano provocado por fármacos como o paracetamol. Este efecto controlador de dano tamén se demostra cando os investigadores eliminaron Fra1 en ratos e observaron un incremento do dano hepático.

Como protexe Fra1 o fígado é outra das cuestións que o equipo de Wagner aborda no artigo. Por unha banda, Fra1 estimula xenes relacionados co sistema de defensa do glutatión fronte aos radicais libres e evita así dano celular; por outra, Fra1 favorece a activación de xenes que provocan a eliminación de tóxicos do organismo.

Estes resultados sacan á luz unha nova peza molecular que podería ser clave no estudo de novos fármacos contra enfermidades relacionadas coa acumulación de tóxicos, como a enfermidade hepática aguda, o alcoholismo ou o cancro.

O equipo resalta tamén a importancia que o papel detoxificante de Fra1 podería ter na xeración de resistencias a quimioterápicos: "As células tumorais utilizan mecanismos moi similares aos de Fra1 para eliminar os axentes quimioterápicos", e engade: "Isto fainos pensar que os tumores poderían utilizar Fra1 para xerar resistencias a estes fármacos e poder así seguir crecendo", conclúe Wagner.

Nunha revisión, o investigador David A. Brenner, da Universidade de California en Estados Unidos, líder mundial en gastroenteroloxía e especializado en enfermidades hepáticas, destaca a relevancia do estudo, e afirma que "debería de proporcionar novos coñecementos sobre o complexo papel de AP-1 [familia de proteínas á que pertence Fra1] en enfermidades hepáticas, así como o potencial uso de inhibidores desta vía de sinalización para o tratamento deste tipo de enfermidades".

Fonte: As Drogas Info