A campaña de Light for Rights conmemora o tema deste ano para o Día Mundial da SIDA: dereitos humanos e acceso universal. Este ano, alenta a que 100 cidades de todo o mundo apaguen as luces dos monumentos públicos para lembrar o devastador efecto que a SIDA tivo e que acendan novamente as luces para iluminar os dereitos humanos fundamentais compartidos por todos pero xeralmente negados ás persoas seropositivas.

“A campaña de Light for Rights envía unha mensaxe de esperanza ao mundo”, dixo Michel Sidibé, Director Executivo de ONUSIDA. “O poder da luz pode levar a mensaxe de que os dereitos humanos son esenciais para a resposta á SIDA”.

“No Día Mundial da SIDA deste ano o noso desafío é claro: debemos seguir facendo o que é efectivo, pero debemos facer máis, de maneira urxente, para manter o noso compromiso de alcanzar o acceso universal á prevención, o tratamento, a atención e o apoio relacionados co VIH para 2010”, afirmou o Secretario Xeral das Nacións Unidas, Ban Ki-moon. “Só conseguiremos este obxectivo se diriximos toda a luz dos dereitos humanos ao VIH. As respostas á SIDA non castigan ás persoas, senón que as protexen”.

A Consellería de Sanidade tamén se suma a esta iniciativa, polo que os próximos días 30 de novembro e 1 de decembro, de 18:30 a 24:00 horas, vaise proxectar sobre a fachada da catedral de Santiago de Compostela un gran lazo a vermello e o lema “Previr é posible”. No momento do alumeado levarase a acabo a lectura dun manifesto como acto previo a iniciar a proxección. Invítase a poboación a participar neste acto, xa que “previr é posible, de nós depende”.

“Se damos luz ós dereitos humanos das persoas que teñen SIDA, estas poderán saía da escuridade e acceder ó tratamento, a información, a atención e o apoio que necesitan para levar unha vida normal”. Dr. Paul de Lay, director executivo adxunto de ONUSIDA.