En España estímase que até o 70 % dos adictos/as a algún tipo de sustancia, como o alcol ou o cannabis, padece tamén outro trastorno mental asociado, o que se coñece como patoloxía dual, segundo asegurou o presidente da Sociedade Española de Patoloxía Dual , Nestor Szerman, con motivo das XIV Xornadas Nacionais que esta entidade celebra estes días en Madrid.

Ambos os factores, adicción e trastorno mental, poden actuar "indistintamente" como "causa e consecuencia" da patoloxía dual en función de cada paciente, engadiu o xefe de Servizo de Psiquiatría do Hospital Vall d`Hebrón de Barcelona, Miguel Casas, quen admite que nos últimos anos está a producirse un incremento de casos asociado ao aumento do consumo de drogas en España.

Segundo explicou este experto, estímase que entre un 10 e 15 % da poboación é vulnerable a padecer algún tipo de conduta aditiva ao longo da súa vida.

E unha das sustancias cuxa adicción está a crecer máis en España é o cannabis, xa que actualmente é o país de Europa con maior número de consumidores/as. "Perdéuselle o medo e minimizase o seu risco", apuntou Casas, advertindo de que estes consumidores/as teñen máis risco de acabar desenvolvendo unha patoloxía dual.

No entanto, engadiu, a relación pode ser tamén á inversa, xa que hai algúns trastornos mentais que propician un maior consumo de cannabis. Proba diso, segundo explicou este experto, é que até o 60 % dos/as pacientes con esquizofrenia son adictos/as a esta sustancia.

Así mesmo, constatouse que os nenos/as que padece un trastorno por déficit de atención con hiperactividade "e non son tratados a tempo" poden comezar a probar o cannabis aos 11 ó 12 anos.

De igual modo, o presidente da Asociación Mundial de Psiquiatría, o cubano Pedro Ruíz, alertou de que en ocasións hai pacientes con algunha enfermidade mental que acaban volvéndose adictos/as á medicación que tanto lles alivia".

Tratamento integral

Por iso, é necesario "diagnosticar rápido" tanto as adiccións como os trastornos mentais para evitar que deriven nun segundo problema, segundo Casas, que defende que a patoloxía dual require un tratamento integral e combinado, e non por separado, "se queremos ter éxito".

Pola súa banda, o delegado do Goberno para o Plan Nacional sobre Drogas, Francisco Babín, asegurou que a patoloxía dual seguirá sendo unha "prioridade" dentro da Estratexia Nacional sobre Drogas, xa que se estima que en 2025 afectará ao 75 % dos adictos/as.

Ademais, ante o adianto da idade de inicio no consumo de alcol e outras drogas advertiu á mocidade que "calquera consumo de drogas pasa factura, tanto á hora do seu desenvolvemento cerebral como desencadeamento doutros cadros psiquiátricos cos que non convén xogar á ruleta rusa".

De igual modo, fixo un chamamento aos pais/nais e aos profesores/as para que colaboren no seu diagnóstico, xa que "son os primeiros que poden advertir algún problema". "Se cadra o rapaz/a con mal comportamento o que está é pedindo axuda a berros e aínda non se deron conta", espetou.

A abordaxe da drogodependencia, en "regresión"

Doutra banda, o profesor Casas denunciou como vicepresidente da Sociedade Española de Patoloxía Dual que actualmente a atención á drogodependencia está en "franca regresión" en España.

"A xente que traballa en adiccións está a darse conta de que vivían nun pequeno espellismo, porque pensabamos que a sociedade e os nosos políticos comprendían o que eran as adiccións e a patoloxía dual, cando moitos temos a sospeita de que se aceptaron as drogodependencias, sobre todo as ilegais como a cocaína ou a heroína, polo medo ás enfermidades infecciosas", asegurou.

Con todo, engadiu, cando viu que estas patoloxías fanse crónicas "e perder o medo a que a enfermidade mate", obsérvase como en realidade séguese pensando que a drogodependencia é "un vicio" e non unha enfermidade.

"Cambiamos o nome pero non o concepto, e nestes momentos volven gañar terreo aqueles que pensan que ao adicto/a, nin auga, porque este o único que ten que facer é curarse, deixar o seu vicio e ser bo", lamentou Casas.

Proba diso, segundo este experto, é que nalgunhas comunidades as drogodependencias non son abordados a través de Medicina senón a través dos Servizos Sociais, "e aí o que farán será tratalas con boa fe e dando máis traballo, coma se o traballo e a drogadicción tivesen algo que ver", cando en realidade "a única forma de abordalas é desde unha atención integral sociosanitaria, e non só con boas intencións".

Fonte: As Drogas Info