A Comisión Europea aprobou o uso de fármaco Truvada® (un comprimido que combina os antirretrovirais tenofovir e emtricitabina) para o seu uso unha vez ao día como profilaxis preexposición (PrEP) fronte á transmisión por vía sexual do VIH. Este é o primeiro fármaco antiretroviral que se aproba en Europa para a profilaxis preexposición, en combinación con prácticas sexuais máis seguras, para reducir o risco de adquirir o VIH por vía sexual en persoas adultas en situación de elevada vulnerabilidade fronte ao virus.

No entanto, aínda que esta autorización de comercialización dá luz verde ao uso de Truvada® como PrEP na Unión Europea, serán as autoridades competentes de cada país as que decidan se lle dan o visto e prace e os sistemas sanitarios nacionais terán que decidir en que condicións se dispensará.

O uso de Truvada® para o tratamento da infección por VIH (como parte dunha combinación con outros antirretrovirais) xa fora aprobado por parte da Comisión Europea en 2005 e, na actualidade, é o antirretroviral prescrito con maior frecuencia en Europa.

No ano 2012 foi aprobado o seu uso pola Axencia da Alimentación e o Medicamento de EE UU como profilaxis preexposición nese país. A aprobación baseouse nos resultados de dous ensaios, nos que tomaron parte 2.499 homes que practican sexo con homes e mulleres transexuais que tomaron un comprimido diario do fármaco como profilaxis preexposición.

A eficacia xeral observada estivo en torno ao 40-50%, pero ao ter en conta os niveis de adherencia, chegou a superar o 90%, o que reflicte a importancia da adherencia para o éxito desta estratexia preventiva. Estudos posteriores reflectiron unha eficacia xeral do 86%.

En xullo do presente ano, a Axencia Europea do Medicamento fixo pública unha recomendación para que se aprobase Truvada® como PrEP en Europa, aínda que Francia xa comezara a proporcionalo con cobertura total por parte do seu sistema nacional de saúde desde o mes de novembro do ano pasado. Precisamente neste país xa se superou a cifra de 1.000 persoas que reciben a PrEP. Hai que destacar que aproximadamente dous terzos toman Truvada® de forma intermitente, en lugar de todos os días, seguindo o réxime utilizado no nun dos estudos citados anteriormente.

A nivel mundial, as directrices clínicas apoian o uso da PrEP en combinación con outras estratexias preventivas para reducir o risco de infección por VIH en adultos en situación de elevada vulnerabilidade. A PrEP non debe administrarse a persoas de estado serolóxico descoñecido (ou a seropositivas), xa que o fármaco non constitúe un réxime completo de tratamento da infección e existe o risco de que se desenvolvan resistencias no caso de que unha persoa teña o VIH e tome unicamente Truvada®.

Ademais dos países mencionados, o uso de Truvada® como PrEP está autorizado en Australia, Canadá, Kenia, Perú e Sudáfrica (aínda que o nivel de cobertura por parte do sistema sanitario varía dun país a outro).

Fonte: gTt-VIH (Grupo de Traballo sobre Tratamentos do VIH)